Бөгөн Бөрө ҡалаһында 25-се «Керәшен һыуыҡтары» төбәк-ара эстрада йыры һәм бейеү фестиваль-конкурсы башланды. Конкурс йылдан-йыл үҙ географияһын киңәйтеп, сәнғәт күгендә яңы исемдәр аса. Быйылғы конкурста Рәсәйҙең төрлө төбәктәренән ғаризалар ҡабул ителгән.
Асыу тантанаһында ҡатнашыусыларға һәм ҡунаҡтарға сәләмләү һүҙе менән Республика халыҡ ижады үҙәге генераль директоры А.А. Әлибаков һәм Бөрө районы муниципаль районы хакимиәте башлығы урынбаҫары Д.Г. Тухбатуллин мөрәжәғәт итте.
Әлеге ваҡытта «Эстрада йыры» номинацияһы буйынса конкурс үтә. Быйыл яҡынса иллеләгән конкурсант ҡатнаша.
Конкурсанттарҙың башҡарыу оҫталығын З. Исмәғилев исемендәге сәнғәт институтының вокал сәнғәте кафедраһы профессоры, Башҡортостан Республикаһының мәғариф алдынғыһы, Башҡортостан Республикаһының халыҡ артисы, Татарстан Республикаһының халыҡ артисы, Рәсәй Федерацияһының атҡаҙанған артисы - Иҙрис Ғәзиев, М.Аҡмулла исемендәге БДПУ-ның эстрада-джаз вокал уҡытыусыһы, Өфө ҡалаһының 4-се балалар музыка мәктәбе уҡытыусыһы, халыҡ-ара джаз фестивале лауреаты - Лилия Литвинова, «Альянс» халыҡ вокал төркөмө, «Кружево» вокал төркөмө һәм «Уйын» балалар студияһы етәксеһе, Ырымбур ҡалаһының юғары категориялы педагог-хормейстер - Сәлихова Наталья, Өфө ҡалаһының «Премьер» вокал төркөмө солисы, халыҡ-ара һәм бөтә Рәсәй конкурстары лауреаты, «Рәсәйҙең йәш таланттары» премияһын яулаусы, Мәскәү ҡалаһының «Донъя таланттары» фонды артисы - Руслан Сәйфетдинов, Республика халыҡ ижады үҙәгенең вокал-хор жанры буйынса баш белгесе, фестивалдең координаторы - Наталья Кондакова баһалай.
Ҡатнашыусыларҙы алда сағыу программа көтә. Иртәгә, 25 ғинуарҙа «Эстрада бейеүе» номинацияһын ҡарау дауам итәсәк. Шулай уҡ фестиваль сиктәрендә мастер-класстар ҡаралған. Йәш йырсылар һәм музыкантар, композитор һәм шағирҙар, бейеүсе һәм хореографтар үҙ таланттарын 26 ғинуарҙа 17.00 сәғәттә Бөрө ҡала мәҙәниәт һарайында Гала-концертта күрһәтәсәк.
«Керәшен һыуыҡтары» фестиваль-конкурсы үҙенең күп төрлөлөгө һәм юғары башҡарыу оҫталығы менән тамашасыларҙы йәлеп итә. Башҡортостандың мәҙәниәт министрлығы, Республика халыҡ ижады үҙәге, Бөрө районы хакимиәте республикала йәшәүселәр өсөн күңелле байрам бүләк итә.