Екатеринбург ҡалаһында Башҡортостан Республикаһының Халыҡ ижады үҙәге менән Урта Урал традицион халыҡ мәҙәниәте үҙәге араһында оҙайлы мәҙәни хеҙмәттәшлек тураһында килешеүгә ҡул ҡуйылды. Документҡа ҡул ҡуйыу Халыҡ ижады үҙәгенең генераль директоры Салауат Киреев һәм Урта Урал традицион халыҡ мәҙәниәте үҙәге директоры Виктория Новопашина ҡатнашлығында үтте.
Хеҙмәттәшлек Урта Урал һәм Волга буйының традицион халыҡ мәҙәниәтен һаҡлауға һәм үҫтереүгә йүнәлтеләсәк. Ҡул ҡуйылған килешеү хеҙмәттәшлекте нығытыу менән генә сикләнмәй, ә берлектәге эштәр өсөн яңы ижади офоҡтар ҙа асасаҡ.
Килешеүҙәргә ҡул ҡуйыу Халыҡ ижады үҙәге делегацияһының Екатеринбург ҡалаһына эш сәфәре сиктәрендә үтте. Осрашыу барышында учреждениелар етәкселәре һәм белгестәре Урта Урал һәм Волга буйының традицион халыҡ мәҙәниәтен һаҡлауға һәм танытыуға йүнәлтелгән берлектәге хеҙмәттәшлекте үҫтереү буйынса фекер алыштылар, тенденцияларҙы һәм мәсьәләләрҙе тикшерҙеләр.