Республика халыҡ ижады үҙәгенең «Атайсал» мәҙәни үҙәгенең «Аманат» халыҡ бейеүҙәре ансамбле Төньяҡ Шэньсиҙа Юлин яҙ фестивален байрам итеүҙә ҡатнаша, ул ошо көндәрҙә Ҡытайҙың Шэньси провинцияһы Юлин ҡалаһында үтә.
Сараны Юлин ҡалаһының муниципаль мәҙәниәт һәм туризм ююроһы менән берлектә Ҡытайҙың CIOFF милли секцияһы ойоштора. Фестивалдә ҡатнашыу өсөн Юлин ҡалаһына Болгария, Рәсәй, Көньяҡ Корея, Таиландтан ижади коллективтары саҡырылған, улар мәҙәни төрлөлөктө популярлаштырыу маҡсатында фестиваль майҙансыҡтарында урындағы ижади коллективтар менән бергә сығыш яһаясаҡ.
Юлин ҡалаһында яҙғы фестиваль 2017 йылдан алып йыл һайын үткәрелә. Был бөтә Ҡытайҙа яңы йылды байрам итеүгә арналған иң ҙур сараларҙың береһе. Концерт программаһынан тыш, фестивалдә ҡатнашыусылар өсөн Шэньси провинцияһының бай мәҙәниәте менән танышырға мөмкинлек биргән саралар ойошторола. Фестивалдең беренсе көнөндә ҡунаҡтар төньяҡ Шэньси халыҡ йырҙары музейына бара, унда улар төбәктең сағыу йыр мираҫын күрә һәм ишетә. Шулай уҡ урындағы паркта экскурсия үткәрелә, унда Бөйөк Ҡытай диуарының бер өлөшө һәм Чжэньбэйтай ҡарауыл башняһы урынлашҡан.
Икенсе фестиваль көнө Һары йылға цивилизацияһы мираҫын һаҡлау һәм күрһәтеү менән шөғөлләнгән Хуанхэ Шэньси мәҙәниәт музейына барыуҙан башлана. Музей мөһим мәҙәни учреждение булып тора, ул үткән һәм киләсәк араһында күпер булып хеҙмәт итә. Ул кешеләргә Хуанхэ тарихын һәм мәҙәниәтен яҡшыраҡ аңларға һәм был ҡиммәтле мәҙәни мираҫты киләсәк быуындарға тапшырырға мөмкинлек бирә. Юлин ҡалаһындағы концерт майҙансыҡтарынан тыш, ансамбль шулай уҡ Цзя өйәҙе Мутоюй ауылы майҙанында сығыш яһай. Төньяҡ Шэньсиҙа Юлин яҙы фестивален байрам итеү 12 февралдә тамамлана.
