14 майҙа Салауат Юлаев исемендәге майҙанда Башҡортостан Республикаһының "АРТ-Ҡоролтай" мәҙәни форумы барышында "CIOFF® VI Бөтә донъя фольклориадаһына тиклем 50 көн" кире иҫәпте асыу тантанаһы була.
Сара 11: 30 сәғәттә Салауат Юлаев майҙанында башлана.
Ваҡиға сиктәрендә байрам концерты ойошторола. Унда Бөтә донъя фольклориадаһының илсеһе, Рәсәйҙең халыҡ артисы, "Рус йыры" театрының художество етәксеһе Надежда Бабкина һәм "Рус йыры" театры ҡатнаша. Шулай уҡ "Арғымаҡ", "Узорица" төркөмдәре, ZAINETDIN, "Мираҫ" йыр һәм бейеү фольклор ансамбле һәм башҡалар сығыш яһаясаҡ.
Кире иҫәптең Церемонияһында CIOFF® президенты Филипп Боссан, CIOFF® вице-президенты һәм Бөтә донъя фольклориадаһына әҙерләнеү һәм уны уҙғарыу буйынса CIOFF® комитеты рәйесе Алехандро Камачо ҡатнаша.
"Рәсәй" медиаүҙәгендә үткән матбуғат конференцияһында Республика халыҡ ижады үҙәге директоры Артур Әлибәков билдәләүенсә, "50" тигән һан осраҡлы билдәләнмәгән. 2020 йылда CIOFF® - Халыҡ-ара фольклор һәм традицион сәнғәт фестивалдәре ойошмалары советы 50 йыллыҡ юбилейын билдәләргә тейеш ине. Коронавирус инфекцияһы пандемияһына бәйле бөтә байрам саралары ла ғәмәлдән сығарылған. 14 майҙа юбилей датаһын билдәләү менән тәүге сара ойошторола.
Хәтерегеҙгә төшөрәбеҙ, CIOFF® VI Бөтә донъя фольклориадаһы Рәсәйҙә 3-10 июлдә үтә. Башҡортостан 55-тән ашыу илдән 2000-гә тиклем ҡатнашыусыны ҡабул итергә әҙерләнә.
Беҙҙең республика 4 фестиваль зонаһына бүленәсәк. 3 июлдә - Өфө-Арена майҙансығында тантаналы асыу, 4 июлдә - "Ватан" паркы майҙанында "Фольклориаданың йөрәге"н асыу тантанаһы була. Шунда уҡ милли кейем парады үткәреү планлаштырылған, унда ойоштороусылар милләттәр түңәрәге буйынса донъя рекордын теркәргә өмөтләнә.
5 июлдә Фольклориаданың 25 коллективы баш ҡалала ҡаласаҡ, ҡалғандары муниципалитеттарҙа сығыш яһау өсөн юлға сығасаҡ. 10 июлдә "Ватан" паркы майҙанында Фольклориаданы ябыу тантанаһы була.
"Муниципалитеттарҙа сит ил артистары менән бер рәттән урындағы коллективтар сығыш яһай. Шул рәүешле улар ҙа Фольклориада барышында үҙҙәрен күрһәтә ала", - тип билдәләне журналистар менән һөйләшеүҙә БР мәҙәниәт министры Әминә Шафиҡова.
