Традицион музыка ҡоралдары фотокүргәҙмәһе Фольклор hәм традицион сәнғәт фестивалдәрен ойоштороу буйынса халыҡ-ара Советтың (CIOFF®️) Йәштәр координацион комитетының төрлө илдәрҙәге ойошмалары ярҙамында булдырылған. Проекттың маҡсаты – музыка ярҙамында халыҡтар араһындағы мәҙәни төрлөлөктө, шул уҡ ваҡытта мәҙәниәттәрҙең оҡшашлығын күрһәтеү. CIOFF®️ йәштәр координацион комитеты донъяла төрлө халыҡтар араһындағы дуҫлыҡ һәм тыныслыҡҡа ынтыла, һәм халыҡтарҙың уҙенсәлектәрен һаҡлауҙың мөһимлеген һыҙыҡ аҫтына ала. Күргәҙмәне төрлө илдәрҙә бер меңдән ашыу кеше ҡарап өлгөргән. Сара АКШ, Аргентина, Италия, Колумбия, Парагвай, Португалия, Рәсәй, Төнъяҡ Македония, Словения, Төркиә, Франция, Чили кеүек илдәрҙә үткәрелгән.
