11 сентябрҙә «Торатау» конгресс-холында «Ватан көсө – Ватан ҡеүәте» тип исемләнгән бишенсе, юбилей форумы үҙ эшен тамамланы. Был сара «Атайсал» проектының 1200-ҙән ашыу ҡатнашыусыһын: меценаттарҙы, ирекмәндәрҙе, махсус хәрби операция геройҙарын, әүҙем йәштәрҙе һәм Рәсәйҙең төрлө төбәктәренән килгән яҡташтарҙы берләштерҙе.
Сараның үткәрелеү датаһы Башҡортостан Республикаһы халыҡтарының милли кейем көнө менән тап килеүе айырыуса символик мәғәнәгә эйә. Осрашыуҙың сағыш прологы булып төбәктең үҙенсәлеген һәм традицияларын ҡатнашыусыларға танытҡан «АТАЙСАЛ. Тыуған яҡ мотивтары» этно-күрһәтмәһе торҙо.
Форумдың эшлекле программаһының үҙәк ваҡиғаһы Башҡортостан Республикаһы Башлығы Радий Хәбиров ҡатнашлығындағы пленар ултырыш булды. Үҙ сығышында Башҡортостан Башлығы биш йыл эсендә яҡташтарының тыуған яғына ярҙам итеү ысулы булараҡ уйлап табылған «Атайсал» проектының ысын халыҡ хәрәкәтенә әүерелгәнен билдәләне. Ошо ваҡыт эсендә уның ҡатнашыусылары һаны 8 меңдән ашты. Улар дөйөм суммаһы яҡынса 2 миллиард һум тәшкил иткән 40 мең проектты тормошҡа ашырҙы.
«Беҙ был проектты башлағанда, уның уңышлы буласағын әле белмәй инек! Әммә беҙ аныҡ аңланыҡ: беҙҙең илдә, республикала башҡаларға, мохтаж булғандарға ярҙам итеүҙе үҙҙәренең тәғәйенләнеше тип һанаған оло күңелле һәм оло йөрәкле кешеләр бар. Ватанға һәм үҙҙәренең бәләкәй тыуған иленә ярҙам итергә. Һәм, моғайын, беҙгә был кешеләргә хеҙмәттәре өсөн рәхмәт әйтергә мөмкинлек бирәсәк механизм булдырыу дөрөҫ булыр ине», – тип билдәләне Радий Хәбиров. – «Был бик яҡты проект. Ул ысын эштәр, кешеләргә ысынлап та ярҙам итеү тураһында. Был осраҡта бер кем дә һәр кемдең күпме аҡса һалыуы буйынса рейтинг төҙөмәй. Беҙҙең үҙ ауылдарында, ҡасабаларында мәктәптәр, балалар баҡсалары, сиркәүҙәр һәм мәсеттәр төҙөгән яҡташтарыбыҙ бар. Беҙ уларға рәхмәт әйтәбеҙ. Шул уҡ ваҡытта дөйөм эшкә үҙ өлөшөн индергәндәргә лә рәхмәт әйтәбеҙ. Мәҫәлән, 30 пар ойоҡ бәйләп, гуманитар конвой менән беҙҙең егеттәргә ебәргән өләсәйгә лә».
Башҡортостан Башлығы гранттары фонды ярҙамында ойошторолған киң масштаблы сара һигеҙ тематик фекер алышыу майҙансығының эшен үҙ эсенә алды.
Программа сиктәрендә оҫталар уникаль эштәрен һәм милли һөнәрҙәрен тәҡдим иткән биҙәү-ҡулланма сәнғәте күргәҙмәләре үтте. Был экспозициялар форум ҡунаҡтарына Башҡортостандың мәҙәни мираҫы байлығын һәм уның халҡының оҫталығын үҙ күҙҙәре менән күрергә мөмкинлек бирҙе.
Иҫегеҙгә төшөрөп үтәбеҙ, «Атайсал» (башҡ. «бәләкәй тыуған ил») – 2021 йылдан Башҡортостан Республикаһы Башлығы Радий Хәбиров башланғысы менән тормошҡа ашырылған киң масштаблы республика проекты. Проект Башҡортостанда тыуғандарҙы берләштереүгә, территорияларҙы үҫтереүгә, Башҡортостан Республикаһы яҡташтарының социаль инициативаларын хуплауға йүнәлтелгән.
