Башҡортостан Республикаһынан уҡсылар Ҡаҙағстан Республикаһының Аҡтүбә ҡалаһында үткән «JAUJUREK мын бала» традиционон уҡтан атыу буйынса турнирҙа уңышлы сығыш яһаны. Ярышта барлығы 150 йәш спортсынан торған 10 команда ҡатнашты. Башҡортостандан турнирҙа өс талантлы уҡсынан торған команда ҡатнашты.
Айрыуса Ауырғазы районынан Батырхан Ғайсин яҡшы һөҙөмтә күрһәтте. Йәш уҡсы «Пута» һәм «Ҡалҡан» дисциплиналарында беренсе урын яуланы. Хәҙер уның миҙалдар һаны 71 етте етте. Батырхан – Ауырғазы районының Толбазы ауылындағы Рәшит Назаров исемендәге башҡорт гимназияһының 9-сы класы уҡыусыһы — биш йылдан ашыу традицион уҡтан атыу менән шөғөлләнә, һәм ошо ваҡыт эсендә күп тапҡыр еңеүселәр пьедесталының иң юғары баҫҡысына күтәрелде. Шулай уҡ Батырхан ҡурайҙа ла уйнай һәм күп республика конкурстарында әүҙем ҡатнаша. Уның уңышы – тырыш күнекмәләрҙең, маҡсатҡа ынтылыштың һәм яҡындарының даими ярҙамының законлы һөҙөмтәһе.
Йәш спортсының үҫешендә атаһы Фаим Салауат улы Ғайсин мөһим роль уйнай, ул өлгөлө «Дуҫлыҡ» ҡурайсылар ансамбле етәксеһе, шулай уҡ Толбазы ауылында традицион йәйәнән атыу түңәрәген етәкләгән өҫтәмә белем биреү педагогы.
Фаим Салауат улы һүҙҙәренсә, Ҡаҙағстанға сәйәхәт иң йылы тәьҫораттар ҡалдырған: «Ҡаҙағстан халҡы бик ҡунаҡсыл. Беҙҙе йылы ҡаршы алдылар, сығыштар һәм аралашыу өсөн иҫ киткес шарттар булдырылды. Турнир спорт сараһы ғына түгел, ә халыҡтарыбыҙ араһында мәҙәни күпергә әүерелде. Мин ҡурайҙа бер нисә башҡорт халыҡ көйөн башҡарҙым – ҡаҙаҡ дуҫтарыбыҙға был бик оҡшаны. Дуҫлыҡ билдәһе итеп беҙ Ҡаҙағстандан йәш спортсыларҙы башҡорт ерендә үткәрелгән ярыштарыбыҙҙа ҡатнашырға саҡырҙыҡ».
Иглин районы уҡсылары ла лайыҡлы сығыш яһаны. Самира Балхиярова «Ҡалҡан» дисциплинаһында чемпион булды һәм «Пута»ла бронза миҙал яуланы. Уның һеңлеһе Динара Балхиярова «Жамба» дисциплинаһында алтын миҙалға һәм Урта Азия мишененә атыуҙа көмөш наградаға лайыҡ була. Башҡортостан спортсыларының сығышы республикала традицион спорт төрҙәренең юғары үҫеш кимәлен тағы бер тапҡыр раҫланы һәм мәҙәни-спорт сараларында бергә ҡатнашыу аша халыҡтар араһында дуҫлыҡ бәйләнештәрен нығытты.
