23 августа Өфөлә «Тамға» халыҡ-ара башҡорт милли кейеме оҫталары конкурсында ҡатнашыусыларҙың эштәрен яҡлау үтте. «Башҡортостан» ҡунаҡхана комплексының "НарыҫТау" конференц-залында ҡырҡҡа яҡын һәләтле оҫта һәм дизайнер үҙ эштәрен эксперт жюриһына тәҡдим итте.
Ҡатнашыусылар үҙ эштәрен өс категорияла: "Башҡорт халыҡ кейеме - реконструкция" (ирҙәр кейеме, ҡатын-ҡыҙ кейеме һәм оҫталар ғаиләһе), "Башҡорт традицион костюмына аксессуарҙар, реконструкция" (ҡатын-ҡыҙ һәм ир-ат аяҡ кейеме, традицион костюмға аксессуарҙар), “Балалар кейеме - реконструкция" номинацияларында күрһәтте.
«Тамға» республиканың мәҙәни тормошонда сағыу ваҡиғаларҙың береһе булды. Ул йөҙләгән оҫтаны, башҡорт милли кейеме һәм аксессуарҙар эшләүселәрҙе берләштерҙе лә инде. Ошо йылдар эсендә милли кейем халыҡҡа яҡынайҙы», - тип сәләмләне ҡатнашыусыларҙы һәм ҡунаҡтарҙы Башҡортостан Республикаһы мәҙәниәт министрлығының социаль мәҙәни эшмәкәрлек бүлеге начальнигы Ирек Иманғәлин.
Ҡатнашыусыларҙың эштәрен мәртәбәле жюри баһаланы. Башҡортостан Республикаһының мәҙәниәт министрлығының мәҙәниәт буйынса йәмәғәт советы рәйесе, «Торатау» Конгресс-холы директоры урынбаҫары, Башҡортостан Республикаһының атҡаҙанған мәҙәниәт хеҙмәткәре Рәнис Алтынбаев жюри рәйесе эшен алып барҙы.
Оҫталар быйыл тәүге тапҡыр башҡорт милли кейеменең күп яҡлы булыуын күрһәтеп, йәйге генә түгел, ҡышҡы кейемдәрҙе лә тәҡдим итте.
Тамашасыларға оҫталарҙың ижадын онлайн режимда күҙәтергә Культура.РФ һәм Республика халыҡ ижады үҙәге сайты мөмкинлек бирҙе.
Һайлап алыу турында Башҡортостандан, шулай уҡ Төркиәнән, Италиянан, Мәскәүҙән, Ырымбур, Силәбе һәм Ҡурған өлкәләренән алтмыштан ашыу оҫта ҡатнашты.
Ойоштороусылар: Башҡортостан Республикаһының Мәҙәниәт Министрлығы, Республика халыҡ ижады үҙәге.
